حيروت- خاص
أكد صحفي جنوبي شاب بأن ” الي مافيش معه يموت!” في مستشفيات عدن.
وقال محمد عادل الاعسم في منشور على صفحته في الفيسبوك: روحت قبل قليل من المستشفى أنا و بنتي (جود) مريضة كانت محمومه شويه وما نزلت الحمى من الفجر المهم قلقت شويه وشليتها اقرب مستشفى خاص مني بالخور عشان اطمن بس انه مش ضنك و ملاريا وذي الخرابيط الي منتشره هذي الأيام..
بأمانة انصدمت حرفيا من الوضع الي احنا فيه بعدن طبعا أنا لي فتره الحمد لله ما دخلت مستشفى بس من الي شفته من أسعار و مبالغه في كل شي يخليك تحمد ربك الف مره انك ما وصلت لمرحلة تكون فيها مش قادر تدفع ابسط تكاليف علاج من فحص و مضاد حيوي و (دريب حمى) .. !
مش عارف والله من اناشد من و لا ايش من مسوؤل عن هذا العبث والقهر والباطل الي حاصل بالمستشفيات و اسعار الدواء من تجار جمله و وكلاء و صيدليات لانه حقيقه مافيش في عدن اي أثر لملامح الدوله والحكومة والسلطه المحليه !
و بدون ذكر اسم (المستشفى) عشان مايكون الموضوع شخصي ولأنه أغلب المستشفيات الخاصه نفس الشيء فبعطيكم ابسط امثله ….
تركيب فراشه الي كان ببلاش و لا ب200 ريال قده ب 1000 الف ريال وبسند رسمي
فحص سي بي سي 3000 الف ريال وكله على ظهر ارتفاع الصرف !
قربه الحمى الصغيره الي كانت 1500 وكنا نقول غاليه قدها 3500 ريال طيب والي عنده ضنك او ملاريا او تيفود ويحتاج ثلاث اربع قرب باليوم كيف يسوي !
مضاد حيوي لطفله عمرها ٤ سنوات 7500 ريال !
أنا وأنت وأغلب الي بيقراء كلامي ولله الحمد ما وصل لمرحلة مش قادر يتعالج فيها لكن والله أن الي عايش على راتبه و معه أطفال أنهم بيموتوا من ابسط حمى وهو مش قادر يشتري لهم ابسط علاج و لا يعملهم فحص !
لا مستشقيات حكوميه تقدر تتعالج فيها و لا رقابه ولا محاسبة و لاخوف من الله و لا سلطة محلية تنقذ المواطن الضبحان من أنياب هاولاء الظلمه و حرفيا” حرفيا” يا ابو محمد احمد حامد لملس الي مافيش معه يموت !
